விவேகி

துக்கமும் துயரும் பொங்கும்
துவிகுரல் சினிமாப் பாட்டு
பக்கத்து வீட்டுப் பையன்
பலமாகப் பாடல் கேட்டேன்
பக்கத்தில் இருந்து பாடம்
படித்தவள் நளினி 'பாபா'
'பக்'கென நூலை மூடிப்
பார்த்தனள் சுற்றும் முற்றும்!

பாட்டிலே சொக்கிப் போய் தன்
படிப்பையும் துறந்தாள் என்று
காட்டினர் வீட்டிலுள்ளோர்!
கணத்திலே, துடைப்பம் தூக்கி
மூட்டைபோல், கிடந்த நாயின்
முதுகிலே போட்டாள் ஒன்று!
வீட்டினைச் சுற்றி நாயும்
"வீல்" என்று கத்த மீண்டாள்!

ஆதலால்.. நளினி பற்றி
அழகம்மா 'ரீச்சர்', நீங்கள்
வேதனைப் படுதல் வேண்டாம்!
விவேகி என் நளினி, ஏதோ
சாதனைக் குறைவு: நாளை
சரிப்பட்டு விடுவாள்.. ஆண்டுச்
சோதனைக் கெல்லாம் நன்றாய்
விடை செய்வாள்! கவலை வேண்டாம்!

எழுதியது25.09.1965 (மாலை – 7.00 மணி)